मोटो हुनुहुन्छ भने यो पढ्नुहोस् , मोटोपन दिमागको लागि कस्तो छ ?

मोटोपना शरीरका लागि मात्र नभई दिमागका लागि पनि उत्तिकै हानिकारक हुन्छ भन्ने तथ्य पत्ता लागेको छ । बेलायतको न्यूरोलोजी पत्रिकामा प्रकाशित नयाँ सोध विवरण अनुसार मोटोपनका कारण दिमागको सोच्ने क्षमता कमजोर हुने गर्छ । तर यस्तो रोगका सबै विरामीलाई डिमेन्सियाको दायरामा भने राख्न नसकिने अनुसन्धानकर्ताहरुले बताएका छन् ।

यसमा मधुमेह, उच्च रक्तचाप जस्ता रोग पनि कारक हुने बताइएको छ । १० वर्ष लगाएर गरिएको यो सोधमा ३५ देखी ५५ वर्ष उमेरका ६ हजार बेलायतीलाई सामेल गराइएको थियो । वैज्ञानिकहरुले मोटा मानिसमा मेटाबोलिजम् पनि असन्तुलित हुने हुंदा सामान्य मानिस भन्दा उनीहरुको सोच्ने क्षमतामा गिरावट आउने बताएका छन् ।

बेलायतको अल्जाइमर्स रिसर्चका वैज्ञानिक शर्ले क्रेमरले मोटोपन र मेटाबोलिजम्को असन्तुलनबाट सोच्ने क्षमतामा कसरी गिरावट आउंछ भन्ने कुरा भने पत्ता लागि नसकेको बताएका छन् । यसअघि गरिएका यस्तै अनुसन्धानहरुमा स्वस्थ भोजन, नियमित व्यायाम, ध्रुमपान र मद्यपानबाट टाढै रहने र रक्तचाप नियन्त्रण राख्न सके डिमेन्सियाको प्रभावबाट बच्न सकिने तथ्य प्रकाशमा आएको थियो ।

 - एजेन्सी