२४ पुस, चितवन । आफुले चलाएको गाडी २० बर्षपछि आफ्नै स्वामित्वमा पाएका छन् चितवनका एक चालकले । आफ्नो स्वामित्वको सवारी चालकलाई नै दिएर सम्मान गर्ने मालिक पनि खुसी छन् । सहचालकबाट चालक बनेर त्यही गाडीको मालिक हुन पाएका भाग्यमानी कालु भनेर चिनिने वीरेन्द्रनगरका विशेश्वर हाल हुन् ।
एउटै गाडीमा दुई दशक लामो मोटर चालकको अनुभव बटुलेर सोमबार उनी त्यही गाडीको मालिक बने ।‘यो गाडी मेरो होला भन्ने सपनामा पनि सोचेको थिइन्’ उनी भन्छन् ‘तर भाग्यले मैले पाएँ ।’ नारायणगढदेखि लोथरसम्म लगातार चलाएको मिनीबस २० बर्षपछि उनले साहुबाट उपहार पाएका हुन् । पुरानै गाडी भए पनि होस गरेर सवारी हाँकेका कारण आफुले गाडीलाई दुर्घटनाबाट बताएको कालु बताउँछन् ।
‘न त कतै ठोक्काएँ न त कहिल्यै दुर्घटनामा नै पारेँ,’ उनी भन्छन् ‘पेसामा इमानदारी देखाए दुर्घटना निकै कम हुन्छ ।’
गाडी मालिक छहारी यातायातका अध्यक्ष बद्री पौडेलले उनलाई उपहार दिएको खबर नागरिक दैनिकले छापेको छ ।
0 comments:
Post a Comment